تقنية تبريد حامض حلو للشوارع!
محمد خلف الشمري
“ياللومي ياللومي حامض حلو يا طبع مظنوني، حامض حلو جيت الحلو بالخيمة شبه القمر بالغيمة فرقا الحلو هضيمه، وانا على فرقا الحلو ما قدر وآااااه”.
المعاق: “يا سلام على الطرب، يا كثر ما سمعتها وانا بالفه، بس هي من له يا حجي”؟
الشايب: “ذكريات تدق ناقوس النسيان (مقوله لازم أتصور معها سلفي)، والله يرحم ايام وارد عراوي، ما اقول غير ارجع يا زمان، بس لا تدعمني! والغنايه يأبوك للفنان المرحوم البحريني محمد حسن”.
الخبير: “سمع هس انا جيت يللا منك له لمون، ويوسف أفندي وعرباوي رشدي، مين يا عم الحج؟ اسمع الخبر اللي يتوزن بعشرة كيلو فول سوداني، بيقولك لأول مرة في السعودية البدء بتجربة تقنية جديدة (حامض حلو) لتبريد الأسطح الاسفلتية للطرق”!
الشايب: “افهمها اشلون، وهل كيف اخاف يبون يحطون مكيفات تحت الشوارع”؟
الخبير: “ما تكبر الدي، وتنفض الجي، يا عجوز يا مكركب! مكيفات ايه اللي بتتحط تحت الشوارع؟ الحكاية وما فيها هيدهنوا الشوارع بمادة خاصة لونها ابيضي زي لون حواجبك! بيني وبينك خطوة ونص الفكرة كويسة يا حضرة. بس فيه مشكلة هتقابل اللي بيسوقوا العربيات، وهي انعكاس ضوء الشمس بعنيهم، وده بيسبب مشاكل من وجهة نظري”.
الشاب: “عز وفخر ما شاء الله عليهم يا خبير، كل شي يتعبون عليه اهلنا بالسعودية، يالربع يحبون دولتهم ويشتغلون لها بإخلاص ما هو بمخلص! باين ان ما عندهم شغل وكيل تاجر (منتج وطني) يأكل ثلاث ارباع الكيكة، ويعطي الربع بالباطن لمقاول يلعب بحسبة معاير المقاييس وش ما كانت”!
الرجل: “منا الي مسؤولينا ليتهم يشوفون (نظارات للبيع) الناس اشلون يشتغلون؟ لان حنا بالكويت نبي شوارع مثل الناس اللي بأفقر الدول! لان الواحد يده على قلبه إذا طلع مشواره هو يرجع لأهله سالم او لا؟ وعلى ما اعتقد الكل سمع عن معاناة الشعب (كسور…تصليح…تبديل…تفليش) ووفياته، الا الحكومة (للأسف كل ثلاث أشهر تشكيل جديد)، ومسؤوليها اللي يمشون على طرق مسفلته تجهز خصيصا لمشاويرهم! ومن خلال هذي المقالة أطلب من أولياء الأمور تذكير عيالهم بترديد دعاء خروج المنزل لان السالفة مطولة!
وبالختام اختم برائعة شباب عمي الشايب “فرقا الحلو هضيمه وياللومي ياللومي حامض حلو”.
المتمولس: “من قائل هذه العبارة: سهر بالليل ونوم بالنهار لا صلاة ولا عباده 1- المتنبي 2- فريد شوقي 3- الوالدة”!
وفي هذه الاثناء رفع على مسامعنا الشيخ زغلول اذان الظهر.
كاتب كويتي
bofahad42@hotmail.com