“شنهو” مفهوم الإعاقة عند أصحاب السيادة ؟

0 343

محمد خلف الشمري

إلا يا خبيرنا ما تقول لي وتفهمني عن معنى قول: “سمك لبن تمر هندي”؟.. قالها المعاق ثم اضاف اسمعها كثير وماني عارف وش المقصود منها؟.
الشايب: دير بالك تشرب لبن عقب وجبة السومك!.
الخبير: تسمحلي يا عمي الشيخ اطلب ايد بنت حضرتك قصدي اجاوب انا لان انا المعني بالسؤال ده ! انا سايبك للحاجات التقيلة ومش عاوزك تزعل اوي لان قلبي بيحبك اوي! ودلوقتي ننتقل لسؤال حبيبنا المعاق عن معنى “سمك لبن تمر هندي” ومعناها هو الاشياء العشوائية والمبعثرة والمتناقضة التي لا تؤكل مع بعضها!
وزي ماهو دارج عند العامة يعني اي كلام لخبطة “مسك الألوان ورسم عالحيط” وقمة في الفوضى!
المعاق: فعلا اللي حصل لي بعد العرض على اللجنة الفنية “اصحاب السيادة” لشؤون الإعاقة هو قمة الفوضى والتناقض فعلا شخبط شخابيط لخبط لخابيط!.
الشاب: بشر، وش صار معاك؟.
المعاق: “سمك لبن تمر هندي” الجماعة ارسلوا لي رسالة باني لا اندرج تحت مفهوم الإعاقة بعد اثنين وعشرين سنة اعاقة وعصا وكرسي وتقارير وعلاج طبيعي وأوجاع الله لا يوريكم!.
الدكتور المختص يسألني من برجه العاجي “حسبي الله ونعم الوكيل” انت عندك شهادة اعاقة دائمة مدى الحياة منذ الطفولة ليش مراجعنا؟ قلت ابي اجدد هويتي! مع العلم ان اللي معاي حسب تقارير وزارة الصحة شلل أطفال وتفلطح بالكراعين واعوجاج بالعظام “اشوف فيكم يوم” وضمور بالعضلات ما ينفع معاها سبنتش بباي!
الرجل: اخاف انت ما خذها بحبة خشم ؟اضحك لأَنِّي عارف وضعك بالسفر معانا بالمطارات تنقلك بكرسي متحرك!
المعاق : والله ياعمي، هم اللي علموني على شلل رجلي اللي اشتكي منها من يوم انا جاهل وهالكلام على القانون القديم بحضور اربعة دكاترة ! وكل ما جاء مدير طلبوني افحص وكل مرة يعطوني اعاقة بسيطة وحتى الشهادة اللي عندي الاخيرة مكتوب فيها مدى الحياة “اللي يبي الأوراق يراسلني هوتميل او تويتر” بتوقيع المديرة الجديدة اللي مبهدلة خلق الله وانا أولهم!!
والله شي يغبن عقب كل هالسنين يطلعوني كذاب ونصاب والله حرام عليهم! وياليت الالم اللي يحوش رجولي ويسهرني يحوشهم لو ليلة وحدة! ما اقول غير “حسبي الله ونعم الوكيل” فيهم جانهم ظالميني! وانا من خلال ديوانيتكم وبعد اشهار المقالة ما راح اسامحهم ليوم الدين، وأسأل الله العظيم انه يأخذ حقي منهم نفر نفر، وساعتها خل الرسم عالحيط ينفعهم وشخبط شخابيط ولخبط لخابيط .
المتمولس : متمولس غيري خطف وحدة متمولسة غيري قامت تصارخ قالها: تسكتين وإلا انزلج ؟ قالت: خلاص راح انطم ! وفي هذه الاثناء رفع على مسامعنا الشيخ زغلول اذان الظهر.

كاتب كويتي
‏bofahad42@hotmail.com

You might also like