“كلن على همه سرى”
محمد خلف الشمري
“والله غريب أمر بعض الصحف الورقية المحلية اللي تقول عن نفسها انها صحافة حرة، وأنها لا تعمل ولا تقبل انها تأخذ تعليماتها من اي كائن يكون! لأنها صحافة مصنفة بالمراتب الأولى عربيا، ولأنها تقدس حرية الرأي والرأي الاخر والقلم الحر، وش ما كان جاف او رصاص”.
الخبير: “قصر يابو الشباب الناس مش فاضية للكلوك الكثير ادينا قشطة المراعي”.
الشاب: “قبل كم يوم مانشيتات البعض منها تتكلم عن غياب الطلبة بالمدارس وتتهم المعلمين والأسر بالتقصير بالمتابعة! واليومين الأخيرين فتحت صفحاتها لكل من هب ودب يتكلم عن عطلة العشر الأواخر من رمضان، وانها تشكل هدرا للوقت وتبذيرا للنفقات، وسلقا للمناهج التعليمية، وتعطيلا لمصالح البلاد والعباد، وان الطلبة هم من سيدفع الثمن”!
الشايـب: “جديـدة سالفـة الطلبـة يدفعـون الثمن (من مبطي دافعينه حنا من جيوبنا) توهم يشوفـونها ويحسـون فيه؟ للأسف يأبوك صحافتـنا البعض منها صحافـة تجـار، ولا تلومهـم ان دافعـوا عن مصالحهـم كـل شـي ولا قطـع الأرزاق!
والله عجيب امرهم ساكتين عن خمال الحكومة اللي معطلة مصالح البلد والعباد من كم سنة، مرة تدعو لانتخابات، وبعد كم يوم تحل المجلس او تبطله (بقاله)؟
الرجل: “ابو الغيرة وينه عن شوارعنا الغرقانه المتهالكة؟ وين جرايدهم عن البديل الستراتيجي، وزيادة الرواتب والاختلاسات، وفساد وتضخم بطالة، وتخلف البلد بكل المجالات؟
ليش ما ينشرون حاجات المواطن اللي يبي معيشة كريمة (عادي قيمر) بكبح جماح الأسعـار اللـي مـولعـة ثـلاث ادبال! وعلى ما اعتقد هذي ابسط حقوقه (تبي حلوق) لأنهم ملو من ابـر التخـديـر، والباصـات البينيـة، والإشـاعـات عن منحة، وإسقاط قروض، وزيادة رواتب، وكلام يدغدغ المشاعر قبل الآباط”.
المعاق: “من الاخر يالربع خلط الأوراق وتشتيت وإلهاء الناس وتعشيمهم بالوهم، اللي معاه تلاشـت فرحتـهـم، وتاهـت خطـوتهـم، وحلمهم الكبير في لحظة انهـدم، ووهم كل المواعين وهم”.
المتمولس: “القوة ليست كل شي، تخيل أنك قوي وصلب، وشرس مثل التمساح وفي النهاية تبيض”!
وفي هذه الاثناء رفع على مسامعنا الشيخ زغلول اذان الظهر.
كاتب كويتي
bofahad42@hotmail.com